TACLOBAN CITY – Ginpahayag han Department of Health (DOH) Regional Office 8 nga maabot na ha 120,700 doses COVID-19 vaccines an naiturok ha bug-os nga rehiyon tikang han pagtikang han vaccination rollout han bulan han Marso.
Sumala kan Jelyn Lopez, tagapagyakan han DOH 8, ha mao nga ihap 99, 855 an nakakarawat han first dose, samtang 20,000 sobra naman an nakakarawat na hin second dose han bakuna o an mga fully vaccinated na kontra COVID-19.
Maabot naman ha 169,770 doses hin Sinovac vaccines ngan 81, 200 AstraZeneca vaccines an kabug-usan nga ihap nga umabot ha rehiyon kun diin pinakaurhi nga batch hin bakuna nga umulpot in maabot ha 28, 800 doses hin Sinovac.
Gintatarget naman han DOH nga makompleto dayon panbakuna ha mga eligible population group usa kasemana mahuman an pag-uulpot han kada suplay o batch hin mga bakuna para ha rehiyon.
