TACLOBAN CITY – Gin-aaghat han Simbahang Katoliko an publiko nga makiusa ha nagpapadayon nga 40 days of prayer o pag-ampo ha sakob hin 40 kaadlaw para ha tidaraon nga piniliay yana nga Mayo 9.
An mao nga inisyatibo in pinaagi han Dilaab Foundation kaupod an Caritas Philippines, kun diin an mao nga kampanya o pag-ampo in nagtikang han nakalabay nga Lunes ngan maghuhuman eksakto ika-40 kaadlaw ha Mayo 9.
Sumala kan Fr. Chris Arthur Militante, Social Media Coordinator han Archdiocese of Palo, an mao nga 40 days of prayer in nagpapanuyo nga tagan hin duon nga importante nga himoon nga sentro han political exercise an Ginoo agud nga magkaada hin malinawon ngan mahimyang nga eleksyon.
Gin-aaghat hini an mga maniringba nga makiusa ha mao nga pag-ampo ha kada misa ha simbahan.
Nahibaruan nga mayda ginpagawas han CBCP nga pamaagi han pag ampo nga asya an ginsusunod han kada lokal nga simbahan para han mao nga 40 days prayers for election.
