TACLOBAN CITY – Gindumara hiton pira nga mga MCH drivers ha syudad han Tacloban iton silent protest kabahin han dire nira pag-uyon han pag one-way han pira nga mga kakarsadahan.
Sumala kan Roger Labarete, President han MEPEROTODA, nagkamay-ada hira hin pagharampang dida han nakalabay nga Sabado kun diin gin kaurusahan nira nga mga Presidente han kada TODA nga silent protest la iton ira pagbubuhaton.
Bahin naman daw hiton ira legal council nga igparada o igarahi nala nira iton ira mga tricyle ha ira kada tagsa nga panimalay o kun diin man hira aadto.
Importante la daw nga dire makakaulang or makakaperwisyo iton ira mga sarakyan nga gingarahi ha karsada.
Waray naman kahidayun gihapon an plano nga tigil-pasada kakulop nga adlaw mahitungod nga ginkasarabutan han mga MCH drivers nga dire nala ine igdayun mahitungod nga damu nga pasaheros iton maapektaran.
An nasabi naman nga silent protest or an pagdudumaraon unta nga tigil-pasada in kabahin daw han dire nira pag-uyon han pagpatuman han one-way policy ha pira nga nga kakarsadahan hiton syudad.
