LAOANG, NORTHERN SAMAR – Dead-on the-spot an usa nga 61-anyos nga biktima mahuman nga panibagson han duha nga suspek ha Brgy. Abaton, Laoang Northern Samar, dida han nakalabay nga adlaw.
Ginkilala an biktima kan alyas El, senior citizen ngan parag-uma, samtang an mga suspek naman in ginkilala kanda alyas Jo-an ngan alyas Jayson, 22-anyos ngan 25-anyos an pangidaron, magbugto ngan mga umangkon han biktima, paprehas nga residente han nasabi nga barangay.
Sumala kan Laoang Municipal Police Station Chief of Police, PMaj. Recardo Banjawan, mayda na gidaan nga delito an pamilya han mga suspek ngan biktima kaparte han daw panukot han biktima ha utang han mga ine.
Basar han imbestigasyon, tikang an biktima ha iya koprasan kun diin dida han pag-uli na hine ha iya balay in gindaop ine han mga hubog nga suspek ngan ginkompronta, kun diin didto nagtikang an mapaso nga batunay han mga ine nga nagresulta ha pagpanigbas han mga suspek ha biktima.
Nag-angkon naman hin magkaduru-dilain nga tinigbasan ha iya lawas an biktima kun diin sobra 10 nga tigbas an naangkon hine nga nagresulta han iya kamatayon.
Dayun naman nga umiskapo an mga suspek han makit-an nga duguan na ngan waray na kinabuhi an biktima.
Ha pagkayana in padayon pa naman an hot pursuit operation han mga kapulisan han mga suspek nga kumalagiw tikadto ha kabukiran nga parte han barangay.
Papasakahan naman an mga suspek hin kaso nga murder.
