Nagpahayag hin suporta hi Senator Bam Aquino ha pagdedeklara han State of National Emergency agud maibanan an padayon nga paghitaas ha presyo han mga papliton resulta han oil price hike.
Sumala kan Aquino, ada na ha crisis level an nasud sanglit suportado niya an pagdedeklara han gobyerno han State of National Emergency agud mabaton an padayon nga paghitaas ha presyo han lana ngan agud mapagaan an pas-anon han publiko ha hitaas nga presyo han papliton.
Apela han senador, dire na hulaton pa han gobyerno nga dumuro an sitwasyon labi na nga waray kasiguraduhan kun san-o mahuhuman an kasamok ha Middle East.
Ha ilarom han State of National Emergency, mayda haluag nga otoridad an presidente agud gamiton an mga government resources ha financial assistance ngan iba pa nga klase hin bulig para ha magkadiru-dilain nga sektor nga nanginginahanglan.
Sugadman, ginpapaghirot ni Aquino an paggamit han kapas ha ilarom han State of National Emergency kun diin kinahanglan mabantayan hin maupay an implementasyon han pitad agud masigurado nga mahingangadto an bulig ha mga nanginginahanglan nga benepisyaryo ngan dire ini maaabuso o magagamit ha korapsyon.
Syahan na nga ginpanawagan ni Aquino an paghahatag hin bulig ha ngatanan han kalakip ha transport sector ngan mga gudti nga negosyo, kun diin kadam-an han mga kababayan in ha sugad nga sektor nagtatrabaho.
