TACLOBAN CITY-Naka-red alert na an mga linemen han SAMELCO 2, para ha posible nga magigin epekto hiton Bagyong Ada ha ira mga nasasakupan.
Sumala kan Decson Bernales, Institutional Services Department, Samelco ll, andam an ira buhatan ngan 24/7 hira may naka-duty agud nga umasister ha mga maapektaran nga barangay.
Andam na gihapon an ira mga higamit ha paghingayad, pananglitan mayda mga linya nga nagka-uutod labi na ha mga tay-aw nga lugar.
Nagpahibaro naman ine ha ira mga nasasakupan, nga kun matawag an mga ine ha ira buhatan nga dire mababaton, karuyag sidngon busy an linya, o mayda gintratrabaho pa an linemen.
Ha pagkayana, presente nga waray kuryente an Barangay San Andres Catbalogan City Samar, matungod han ira ginhimo na manual ineterruption, matungod nga hitaas na an tubig-baha dara ni Tropical Depression Ada.
Samtang 3 naman nga barangay han Marabut Samar, an naka eksperyensya hiton pagparong han kuryente kagabi pero dayon naman ine nahibalik han ka-agahon.
Kalakip ha mga naka-abat hiton pagparong han kuryente an Paranas, Calbiga, San Sebastian ngan Hinabangan Samar, pero dayon gihapon nga naibalik an linya han kuryente han ala-una hiton ka-agahon.
Ginlalauman naman nira nga magigin mauran pa an bug-os nga adlaw hiton Biyernes, matungod ginlalauman gihapon nga mag-lalandfall niyan nga gabi o iton ka-agahon han Sabado hi Bagyong Ada.
