TACLOBAN CITY – Ginpahayag han Regional Tripartite Wages and Productivity Board (RTWPB) Regional Office 8 nga padayon pa hini nga ginpapag-adman kun magkakaada hin increase ha minimum wage ha rehiyon.
Una hini, may mga petisyon na nga ginsalawad ha RTWPB nga nagduduso han increase nga P750 tikang ha P325 minimum wage ha rehiyon.
An mao nga panawagan han minimum wage increase in nag-ugat tungod han padayon nga araba han mga katawhan han hitaas nga presyo han produktong petrolyo sugadman han pira nga mga primero nga papliton.
Sumala kan Reynaldo Soliveres, Board Secretary VI han RTWPB 8, ha pagkayana in mahugot nga ginpapag adman han ira mga opisyal kaupod an iba nga mga ahensya an bahin han mao nga panawagan nga umento han minimum wage.
Dugang pa hini nga may mga criteria o indicators nga ginbabasehan an RTWPB ha pag-desisyon bahin hini partikular na an consumer price index ha rehiyon, cost of living o panginahanglan han mga empleyado ngan ira mga pamilya, kapasidad han mga employers ha pagpasweldo ha ira mga empleyado, prevailing wage levels ngan iba pa.
Gintatalinguha han RTWPB nga mababalanse an mao nga mga indicators ha ira desisyon nga pagbubuhaton kun angay ba o dire nga magkaada hin minimum wage increase.
