TACLOBAN CITY – Duha an patay kaupod na an usa nga pulis samtang upat nga biktima naman an samaran mahuman an nahitabo nga karambola han tulo nga sarakyan ha Poblacion District 4, bungto han Julita, Leyte.
Dabi ha mao nga banga-ay an usa nga pick up truck, single nga motorsiklo ngan usa nga mini dump truck.
Ginkilala an mga namatay nga biktima nga hi Patrolman Vincent Paul Abad, naka-assign ha Southern Leyte Police Provincial Office 2nd Mobile Force Company, nga nag da-drive han iya motor, ngan hi Noli Caña naman nga residente han Julita ngan driver han pick up truck.
Sumala kan PSSg. Bryan German Macaso, Duty Investigator hiton Julita Municipal Police Station, subay han inisyal nga imbistagasyon nag-overtake an pulis nga hi Abad ha mini dump truck kun diin waray hine makit-an an tikaharani nga pickup truck ngan nagin hinungdan han mao nga karambola.
Dayun naman nga gindara hira Abad ngan Caña ha ospital, pero gindeklara an mga ine nga dead on arrival samtang padayun naman nga nagpapaupay an iba pa nga mga samaran nga biktima.
Hapagkayana in padayun la gihapon an ginbubuhat nga imbestigasyon han mga kapulisan han mao nga insidente.
