TACLOBAN CITY – Nahipatik iton mahugaw nga pamaagi ha pag-ihaw hiton karne han karabaw ngan baka ha slaughter house han Tacloban City.
Sumala kan Bing Salazar, Presidente han Meat Vendors Association han Tacloban City Market, nagtikang ine dida han pagdamo hiton mga mag-irihaw ha slaughter house nga rason hiton pagka waray hiton management ha pag-ihaw hiton mga karne kun diin maabot na ha punto nga malain na an hamot hiton slaughter houses tungod hine nga panhitabo.
Mababaruan nga waray ig-pan dispose an mga sobra nga mga bituka ngan tina-e hiton mga karabaw ngan baka, waray gihapon panlimpyohi hin maupay an mga ine, waray pankimpite an mga tiil hiton karne kun diin nagkakalat la an mga ine nga klaro nga waray trabaho-a hiton maupay.
Dugang pa ni Salazar, nga posible gihapon nga humitaas iton presyo hiton karne han karabaw ngan baka kun magpadayon ine, tungod nga iton kantidad para paglimpyo in igpapatong na ha presyo han karne nga igbabaligya ha mga konsumer.
Responsibilidad mangud gihapon iton mga parag-ihaw nga paglimpyo hiton slaughter house.
