TACLOBAN CITY – Ginlunsar han Ormoc City Government an PROJECT GOMA o Governance Outreach to Monitored Area nga nagpapanuyo nga mamentinar an kahimyang han bug-os nga syudad ngan maproteheran an mga residente hini ala kontra ha recruitment han CPP-NPA.
Ini nga programa in localized nga bersyon han EO No. 70 han national government kun diin igpapatuman an iba-iba nga programa han gobyerno ha lima nga tay-aw nga barangay han Ormoc City nga namomonitor han militar nga bulnerable ngan may hulga hin panrecruit hin mga NPA.
Kalakip ha mao nga mga barangay an Liberty, Gaas, Lake Danao, Cabintan ngan Quezon Jr.
Sumala kan Ormoc City Mayor Richard Gomez, an PROJECT GOMA in maupay nga higayon para ig-andam ngan tagan hin pahimatngon an publiko nga dire akseptaron ngan dire magpadara ha mga panguwat o pan-aghat han mga miyembro han rebelde nga grupo.
Ginsisiguro han syudad nga maihahatag hini an serbisyo nga kinahanglan han mga katawhan ngan usa na hini an pinaagi kan Congresswoman Lucy Torres kun diin tanan nga mga karsada han lima nga priority barangays in nasemento na ngan pito ka-kilometros nala an kinahanglan sementuhon.
Nahibaruan nga subay ha report han National Intellegence Coordinating Agency (NICA) 8, nagpapabilin nga mahimyang an Ormoc City ngan kahirani hini nga mga munisipyo pero may mga report nga nagpoprobrar na an CPP NPA NDF nga marecover an ira mga mass base ha mao nga syudad.
