Papahugton han National Tobacco Administration (NTA) an mga pitad hini ha produksyon han tabako agud malikayan an duro nga harvest ha maabot nga 2026-2027 planting season. Subay ha ahensya, kinahangan ig-uyon han mga parag-uma an ira pagtatanom ha aktwal nga panginahanglan han merkado agud malikayan an sobra nga suplay ngan pagkalugi.
Ginmalatumat ni NTA Administrator Belinda Sanchez nga tututukan han ahensya an pagpapabilin han madig-on nga kita han mga tobacco farmers ha butnga han pabag-o bag-o nga global market. Dugang pa, an pagsunod ha market demand ngan pagtutok ha de-kalidad nga harvest an pinakamabisan nga paagi agud malikayan an pagdiwara han mga mamaralit ngan pagkalugi han mga parag-uma.
Gin aaghat gihapon han NTA an mga parag-uma nga waray pa kontrata ha mga tobacco buyer nga magparehistro ha Tobacco Contract Growing System agud maiplano an produksyon subay ha panginahanglan han merkado. Ha presente, ada ha 35,000 han 45,000 nga rehistrado nga tobacco farmers ha nasud an waray pa formal contract growing agreement.
Nauna na nga nahipatik han NTA nga nagkamay-ada hin sobra-kulang 5 milyon kilos nga sobra nga produksyon han Virginia tobacco ha Ilocos Sur, Ilocos Norte, Abra, ngan La Union—kaparehas han 27% nga sobra ha nakaalutaga nga papaliton han mga tobacco trader ngan cigarette manufacturer. Mahitungod hini, gin aaghat gihapon an mga parag-uma nga magtanom la ha mga angkop nga tuna agud maupay an kalidad nga harvest ngan mabaton an standard han mga mamaralit.
