TACLOBAN CITY – Bumusita hi National Security Adviser Clarita Carlos dida han Miyerkules Oktubre 26, 2022 dinhi ha Sinirangan Bisayas agud panginanuon an mga programa han Regional Task Force-8 ELCAC nganhi ha rehiyon.
Ginpahayag hini nga an NTF-ELCAC in dire permanente salit kinahanglanon nga mas pakusgon pa an mga programa agud mapuypoy na an mga insurhiya nga aktibadad ha rehiyon 8.
Gindugang pa ni Carlos, nga iya igduduso iton pag-restore hiton Support to Barangay Development Program (SBDP) para ha mga masunod nga tuig in maundangan na an insurhiya ha mga hagrayo nga komunidad dinhe ha rehiyon.
Gintatagan hin alokasyon nga P20 M pamaagi hine nga programa ha mga bungto nga waray na impluwensiya hiton New People’s Army.
Ini in gagamiton para magtindug hin mga infrastructure projects sugad hiton farm-to-market roads, malimpyo aralugan hiton tubig, sanitation systems, mga agrikultural nga pakabuhi, ngan technical vocational training.
An SBDP in usa nga flagship project hiton NTF-ELCAC, na ginhimo ni anay Presidente Rodrigo Duterte pamaagi hiton Exectuive Order 70 dida han December 4, 2018.
Dida han 2021 funding hiton Sinirangan Bisayas, in nabuligan an 6 ka remote villages ha Northern Samar. Samtang 17 projects liwat an ira nakompleto, 18 pa napadayon ha pagkayana, ngan 5 an under procurement.
