TACLOBAN CITY – Ha syahan nga adlaw han pagpatuman han price ceiling ha mga bugas, nagdumara gihapon hin profiling ngan validation an Department of Trade and Industry (DTI) ha mga baligyaan hin bugas ha mga bungto ngan syudad ha rehiyon.
Kaupod ha nasabi nga panginano in amu an Department of Agriculture (DA), Local Government Unit (LGUs), ngan mga Local Price Coordination Council (LPCCs) nga may-ada naman ha kada bungto ngan syudad.
Sumala kan Aivi Borbon-Ancheta, Information Officer lll hiton Department of Trade and Industry (DTI) Regional Office 8, mayda na hira mga collaborative meetings nga ginbubuhat kaupod han mga nahintutuinan kaparte han nasabi nga istoryahon ngan ira na gihapon ginpapagios an mga LPCCs han kada lugar para naman magin updated ha mga presyo han bugas ha mga merkado.
An Department of Trade and Industry (DTI) naman an nangunguna ha profiling ngan pag-validate han mga retailers kun nagsusunod ba an mga ine han ginpapatuman nga price ceiling kun diin nagtikang na daw gihapon an ira coordinative meeting kaupod an iba nga ahensya para paghingadayan kun patiunan-o han mga ine mabubuligan an mga retailers.
Gintagan gihapon hine hin duon nga dire pa enforcement an ira gin bubuhat nga monitoring – listing ngan profiling pala daw an ira ginhihimo han mga retailers han mga tagsa-tagsa nga merkado nga rehiyon.
Ha nasabi nga monitoring in kikitaon daw kun accredited ba an usa nga tindahan o retailer nga magbaligya hin bugas. Pananglitan naman daw makatalapas an mga ine in dire la anay hira mahatag hin Notice of Violation ha mga retailer mahitungod nga an panuyo daw hine in pagvalidate la anay.
