Posible nga magbayad hin milyones ka-dolyar hin legal fees hi Prince Harry ngan iba pa nga kilala nga personalidad mahuman nira mapirde ha ginpasaka nga privacy lawsuit kontra ha publisher han Daily Mail ha United Kingdom.
Ha pagdungog han High Court ha London, gin hangyo han kampo han Associated Newspapers nga batunon han mga nagpasaka han kaso an dako nga parte han ira legal expenses, umabot ha £34.5 million o haros 46 million US dollars.
Kaupod ni Prince Harry ha mga napirdi ha kaso an singer nga hi Elton John ngan lima pa nga kilala nga personalidad. Syahan na nga ginbasura han korte an ira alegasyon nga dabi an Daily Mail ha mga ilegal nga buruhaton, kaupod an gin aalegar phone hacking ngan iba pa nga pagtalapas ha privacy.
Sumala ha abogado han Associated Newspapers, waray suprisyente nga ebidensya an mga nagpasaka hin kaso agud pamatud-an an ira mga akusasyon, rason agud dumako an gastos ha pagdungog.
Samtang, gin malatumat naman han kampo nira Prince Harry, nga sobra an gin aaro nga legal fees han publisher ngan nag-presenta hira nga magbayad hin £8 million kumo pauna nga bayad.
Nakatalaan nga igpadayon han korte an pagdungog agud pagdesisyunan kun pira an kinahanglan bayaran han mga nagpasaka hin kaso ha legal expenses han Associated Newspapers.
