TACLOBAN CITY – Ginpahayag han Philippine Coconut Authority (PCA) Eastern Visayas nga hitaas ha pagkayana an presyo han kopra o lugi nga dako naman nga bulig ha mga parag-uma hin lubi ha rehiyon.
Sumala kan Joel Pilapil, Regional Manager han PCA 8, ha pagkayana in maabot ha P42 ngada P43 an presyo han lugit ha millgate.
An paghitaas han presyo han lugit in mahitungod han pag-ubos han produksyon hini tikang han magkadidistroso an mga kalubian han rehiyon han paglasurbo han bagyong Odette han naglabay nga tuig.
Nanawagan naman ini ha mga paraglugit nga sali-aton yana nga panahon nga hitaas an presyo han kopra ngan siguraduhon naman nga maupay an kalidad han lugit nga ira ginbabaligya agud nga maging maupay an produkto hini para han mga mamaralit.
Samtang, ginpahayag naman han mao nga opisyal nga ha pagkayana in gin-aprubahan na an moratorium o response for rehabilitation ha mga lubi nga nagkatutumba partikular na ha probinsya han Southern Leyte kun diin libre an permit to cut han mga ini agud nga mapadagmit an debris clearing.
Ha mao nga moratorium, obligasyon han processor nga ighatag an 10% han lumber nga ira makukuha ha LGU agud nga makabulig liwat ha paghatag hin kahoy ha mga constituents ha paghingayad han ira mga panimalay nga nadistroso han bagyong Odette.
