TACLOBAN CITY– Patay an usa nga Presidente han Farmer’s Association, mahuman ine nga pusilon han waray pa kakilal-i nga mga suspetsado ha Brgy. Tag-Abaca, Leyte, Leyte .
Ginkilala an biktima kan alyas Winny 48-anyos, ngan residente han nasabi nga barangay.
Sumala kan PMAJ. Edwin Tolibas, Chief of Police han Villaba Municipal Police Station, nga subay ha gindumara nga imbestigasyon han kapulisan, sakay an biktima han iya motorsiklo ngan pauli na ine ha ira panimalay han tigda nala ine nga pagpusilon ha magkalain-lain nga parte han iya lawas han waray pa kakilal-i nga suspetsado nga sakay hiton Toyota Fortuner.
Hapagkayana, padayon na nga ginhahalpat hiton kapulisan an nasabi nga suspetasado ha mao nga krimen agud nga mabaruan an motibo han mao nga panmumusil.
