TACLOBAN CITY – Posible nanaman nga madugangan an sweldo ngan magpatuman hin panibag-o nga minimum wage ha Sinirangan Bisayas yana nga tuig 2024 sumala han Department of Labor and Employment (DOLE).
Sumala kan Atty. Cecilio Baleña, mediator-arbiter han Department of Labor and Employment (DOLE) Regional Office 8, nga gintikangan na manggud han Regional Tripartite Wages and Productivity Board (RTWPB) an mga ginbubuhat nga mga public consultations ha iginhihingita nga umento ha sweldo ha mga magnarabo dinhi ha rehiyon.
Nahuman na manggud hira han pagbubuhat hin mga konsultasyon ha syudad han Catbalogan ngan Ormoc; ngan mayda pa pagbubuhaton nga consultations ha syudad han Tacloban ngan Maasin, ngan ha Catarman, Northern Samar.
Waray naman iginhatag pa nga detalye hi Baleña kun pira an magigin umento ha sweldo nga makakarawat han mga minimum wage earners.
Kun mahihinumduman, dida han Nobyembre 2023 in nagpagawas hin wage order an RTWPB nga kun diin, aada na ha P405 kada adlaw an minimum wage ha rehiyon.
