TACLOBAN CITY – Ginpahayag ni Leyte Governor Leopoldo Dominico Petilla nga gin aprubahan na an pondo para ha paghingayad han mga housing units o pabahay para ha mga anay rebelde ha Peace and Prosperity Village ha San Isidro, Leyte
Sumala ha gobernador nakakarawat hiya hin mensahe tikang ha Presidential Communications Operations Office (PCOO) Assistant Secretary JV Arcena nga tikang kan National Housing Authority (NHA) General Manager Jun Escalada kasumpay ha approval han mao nga budget.
Dugang pa hini nga maabot ha P210 million kapesos an gin alutaga nga pondo para ha housing units nga pagtitindugon ha Sitio Limite, Brgy Daja Daku, San Isidro, Leyte.
Pira naman nga mga resikitos an gin-aandam pa ha pagkayana agud nga madownload an pondo ha local government.
Maabot hin 450 nga mga pabalay iton nakatalaan nga pagtindugon ha Peace and Prosperity Village nga aada ha sulod han 120-kaektarya nga propyedad han Leyte provincial government.
Ini nga lote in gintunga tunga na kon diin kada benepisaryo in makakarawat hin duha nga tuna, usa iton pagtitindugan han ira balay ngan an usa naman nga tuna para ha ira garden.
Mababaruan nga ini nga housing project in usa ha mga patapod ni President Rodrigo Duterte han bumisita ini ha San Isidro, Leyte dida han nakalabay nga Enero 23, 2020 ngan kaparte liwat ini nga proyekto han Enhanced Comprehensive Local Integration Program (E-CLIP) han gobyerno.
Samtang , ginpahayag gihapon ni Petilla nga gintikangan na PHP67 million nga road concreting project tikang ha main road ha San Isidro tikadto ha Peace and Prosperity Village.
Labot la hini usa pa nga karsada iton ginhihingayd tikang ha Peace and Prosperity Village tikadto ha Calubian, Leyte kon diin nagkakatindad ini nga proyekto hin PHP235 million
Kon matapos na ini nga karsada lalauman nga mas magigin hapsay na an pagdeliver han mga produkto han mga anay rebelde ngan mas ma-iimprove pa an marketability han ira mga produkto.
Mababaruan nga an mga rebel returnees in nagtatanom hin mga high-value crops ngan nagpapatubo liwat ini hin mga manok para ha egg production mahuman hira igpailarom ha training han Leyte provincial agriculture office.
