NATIONAL – Nagsalawad na hin balaudnon an mga lider han Kamara de Representantes agud padayon na nga matuldukan an Philippine Offshore Gaming Operators (POGO), usa nga pitad nga nagpapadig-on ha direktiba ni Presidente Ferdinand Marcos Jr.
Ha balaudnon nga Anti-Offshore Gaming Operations Act, nakatalaan nga igpasara an tanan nga POGO ngada hiton Disyembre 31, 2024.
An nasabi nga balaudnon in igin-salawad antis magtikang an hearing han House quad committee dida han Biyernes, kasumpay han iligal nga operasyon han POGO ngan an posible nga koneksyon hine ha illegal drug operations ngan extrajudicial killings ha implementasyon han war on drugs campaign han Duterte administration.
Nakabutang gihapon ha balaudnon an report han Department of National Defense nga an POGO in nagseserbi nga tarhog ha nasud matungod nga gin-gagamit ine han mga international criminal syndicate.
Ha ilarom han balaudnon, an mga makakatalapas hine in mag-aatubang ha upat ngada ha 10 katuig nga kapresuhan ngan kutob ha P10 milyon nga penalidad.
