Ha panuyo nga mapuypoy an illegal fishing ha Sinirangan Bisayas, upat kabeses ha usa kabulan magpapatrolya ha mga kadagatan an PNP kaupod an mga tinaglawas han Bureau of Fisheries and Aquatic Resources ( BFAR ) Region 8.
Ini an nagin patapod han duha nga ahensiya ha ilarom han ira ginpirmhan nga Memorandum of Understanding kasumpay han ginmugna nga Joint Task Force Bantay Karagatan.
Ha magigin operasyon han duha nga ahensiya han gobyerno, usa nga PNP patrol boat nga may ngaran nga MV Lakan an makakaupod han mga tinaglawas han BFAR ha pagpapatrolya ha mga baybayon.
Lakip dinhe an usa ka-team han PNP nga magtitikang ha Regional Mobile Force Company.
Tungod nga hilu-ag an baybayon han Sinirangan Bisayas magigin prayoridad han joint task force an mga kadagatan kon diin talamak an iligal nga pangisda.
Kaupod dinhe an Samar Sea, Leyte Gulf, St. Bernard Strait ha Southern Leyte ngan kadagatan ha Northern Samar.
Sumala kan PSupt. Ma. Bella Rentuaya, tagapagyakan han Police Regional Office 8, dako an mabubulig han ira mga intellegence operation para matudlok kon hira hin-o an nagdudumara han ilegal nga pangisda.
Lalauman daw nga mayda na magbabantay ha mga kadagatan agud ng maundang na ini nga iligal nga aktibidad.
Gin-aghat naman ha mao nga opisyal an publiko nga bumulig ha ira kampanya ala kontra illegal fishing ngan diri mag-alang nga magsumat ha mga kapulisan kon mayda nakikit-an nga nagbubuhat hini nga iligal nga buruhaton.
Sumala naman kan BFAR Regional Director Juan Albaladejo, napapanahon daw an pagmugna hini nga joint task force ilabi na nga humabubo an fisheries production ha rehiyon hin 29 porsyento.
An madadakop ha iligal nga pangisda in maatubang ha kaso nga kriminal ngan administratibo ngan penalidad nga maabot 500,000 kutob 3 milyones kapesos tipaigbaw ha ilarom han RA 10654 o kon An Act to Prevent, Deter and Eliminate Illegal, Unreported and Unregulated Fishing.
