NATIONAL – Nagbug-os an Philippine National Police (PNP) hin special teams kaupod an top investigators para lanaton an mga indibidwal nga bumuligha pagtatago ni KOJC founder Apollo Quiboloy nga nag-aatubang ha mga kaso han child, sexual abuse, ngan qualified human trafficking.
Pira han pangunahon nga task han team in an pamiling ngan pagberipika ha mga social media post, publication, ngan iba pa nga impormasyon hiunong han Quiboloy, pag-validate ngan authenticate ha nasabi nga mga material pinaagi han ACG, pamiling han mga pahayag ngan affidavits tikang ha mga tawuhan han PNP nga kaupod ha pagseserbi han arrest warrant kontra kan Quiboloy, pagkuha han mga testimonya tikang ha mga biktima ngan complainants, ngan pagkoleta han documentary evidence tikang ha iba nga mga ahensya nga magpapakusog ha kaso.
Gin pagios na gihapon an lain la nga tracker team para bilngon hi anay Presidential Spokesperson Harry Roque nga mayda detention order tikang ha Kamara.
Ine in mahuman nga ma-cite in contempt ha ikaduha nga higayon hi Roque mahuman nga waray magsumite han mga gin-aaro nga dokumento para ig justify an pagdako han iya yaman nga ginsusumpay ha illegal nga POGO.
Samtang, nagbug-os gihapon hi PNP-Criminal Investigation and Detection Group (CIDG) Director Leo Francisco hin usa nga composite team nga ginbubug-os han CIDG ngan Anti-Cybercrime Group (ACG) officials para ha pagpapasaka han komprehensibo nga kaso kontra ha mga indibidwal nga bumulig kan Quiboloy.
