Tacloban City – Ginhisgutan han durudilain nga mga ahensiya han gobyerno kon patiunan-o huhumanon an Basey- Maydolong road project nga diri makakapangutod hin mga kahoy nga aada ha sulod han Samar Island National Park (SINP) nga usa nga protected area.
Dida han nakalabay nga Hunyo 18, nagdumara hin interagency coordination meeting an mga opisyales han Department of Public Works and Highways (DPWH), Department of Environment and Natural Resources (DENR) kaupod hi 4Ps partylist representative House Minority Floor Leader Marcelino Libanan agud paghimangrawan an mga plano ha pagtangpos han nga kalsada magsusumpay han probinsya han Samar ngan Eastern Samar.
Nagkasarabot an mga opisyales nga gamiton an “old logging road” o kon an karsada nga gingagamit han purupangahoy han 1970s ngan 1980 basi mamiminus minusan iton pagpupudlon nga mga kahoy hangtud nga matapos an proyekto.
“These roads were used by trucks, and they are still existing today. We sent a team from my office, DPWH, and DENR to check the logging road and take videos,” siring ni Libanan ha gindumara nga interagency meeting.
Ha panibag-o nga plano, an pagtitindugon nga karsada in mas mahilaba hin 2.7 kilometers ngan manginginahanglan gihapon nga magtindog hin 80- metros nga tulay.
Tuig 2016 han tikangan an paghimu han Basey- Maydolong road ngan ha pag hagus hin walo katuig aada pala ha 24.60 percent an completion rate han proyekto.
Matarap ini ha Borongan-Maydolong-Llorente close canopy ug ha sakub han Samar Island Natural Park nga mga protected area sanglit nag iiha an pagtrabaho tungod kay damo nga mga tigurang nga mga kahoy iton kinahanglan likayan nga pudlon labot la ha mahinay nga pagdownload hin pondo han mga nakalabay nga katuigan.
Ini nga pagtatangpuson nga karsada in may kahilab-on nga 68.62 kilometers kon diin 35.85 kilometro in adtu nahimumutang han Eastern Samar ngan an 32.77 kilometro naman in adi ha Samar.
Kun matapus ini, tikang ha sobra 190 kilometers nga kahirayu han Borongan tikadi ha Tacloban o harus upat ka oras nga biyahe, in magigin sobra 113 kilometers na la ini o duha ka oras nga pagbiyahe.
Ini nga proyekto in ginpondohan hin P3.319 billion ngan target nga mahuman ha 2028 san-o mahuman iton termino ni Presidente Bongbong Marcos.
