TACLOBAN CITY – Ginsalin-urog han Plan International Pilipinas an International Day of the Girls ha Luzon, Visayas, ngan Mindanao ha pamamaagi han magkaduro-dilain nga mga programa nga may panuyuan nga pakusgon an partisipasyon han mga kabataan nga babaye.
Kasumpay hini, ginlunsar an “Stand with Girls” campaign agud igduso an katungod, proteksyon, ngan pagkakapantay-pantay para ha mga kabataan.
Ha sulod hin sobra duha kadekada, padayon an pakikipag-koordinar han Plan International Pilipinas ha mga lokal nga panggobyernohan ha pagduduso han mga programa nga naka-pokus ha kabataan.
Lakip gihapon ha selebrasyon an “Girls’ Takeover”, diin gintagan hin tsansa an mga babaye nga gumanap kumo lider ha magkaduro-dilain nga sektor agud maipakita an ira kakayanan ngan potential.
An selebrasyon in nagsisirbe nga pahinumdom hiton importansya ha paghahatag hin pansin ha mga isyu nga ginkakaatubang han mga kabataan nga kababayen-an ngan ha padayon nga pagduduso han pantay nga oportunidad para ha ira mga kinabubwasan. (via Bombo Shiela Encio)
