TACLOBAN CITY – Padayon pa an ginbubuhat nga balidasyon ngan monitoring han Samar Police Provincial Office ha mga lugar ha bug-os nga probinsya nga sadang igpailarom ha PNP watchlist o ha COMELEC control.
Sumala kan PSSupt. Nicolas Torre III, provincial director han Samar PPO nga ha pagkayana in waray pa lugar ha pronbinsya han Samar nga ginpailarom ha ira control pero mayda hira ginhihingita nga mga lugar nga mayda historya hin kasamok, presensya hin private armed groups, rebelde nga grupo, ngan political rivalry labi na ha syahan nga distrito han Samar sugad han syudad han Calbayog, Sta. Margarita, Gandara, San Jorge ngan iba pa kun diin may ada pira nga kaso hin shooting incident nga gintutuuhan nga may pulitikal nga motibo.
Dugang pa ni PSSupt. Torre, nga ha pagkayana in mas pinahuruhugot an ira monitoring nga ginbubuhat ha mao nga mga lugar agud nga masigurado nga mahimyang ngan talwas an nagtitikahirani nga piniliay.
Mahinunumduman nga una na nga ginngaranan nga “Killbayog” an Calbayog City mahitungod han sunod sunod nga kaso hin pamatay ha mao nga lugar han nakalabay nga mga bulan.
