TACLOBAN CITY – Pira nga istudyante han Leyte Normal University an tumambong ha gindumara nga walk-out rally, kakulop nga adlaw, kaparte han EDSA People Power
An nasabi nga rally in gindumara ha bisinidad han University of the Philippines-Tacloban Campus, kun diin gindudumdom han mga istudyante an importansya han EDSA nga ha karsada nagtikang, ngan syahan nga nabatian ngan nagkamay-ada hin boses an mga katawhan.
Sumala kan LNU student ngan National Union of Students of the Philippines (NUSP) Vice President Jon Ivan Torreros, panuyo han ira pagbulig nga mga Normalista nga igpasabot ha publiko nga dire la mga ‘basta istudyante’ an mga istudyante, kun diin, dire an mga ine magpapakabuta-buta ngan ig babaliwaray an ideyalidad han kamatuuran nga nahitabo ngan na-eksperyensyahan han mga Pilipino, 39-katuig na an nakalabay.
Sumala pa haiya, an pagtambong ha sugad nga aktibidad in agud igpakita an pagkaka-urusa han mga istudyante ngan igpasabot ha administrasyon nga an mga istudyante in dire mahingangalimot han mga panhitabo bisan paman kun tanggalon ha kalendaryo an adlaw han EDSA People Power Revolution.
Dire daw angay kalimtan an gintikangan han People Power ngan an pakigbisog han Pilipino mahitungod nga an nasabi nga panhitabo an naghatag ha mga Pilipino hin demokrasya, katungod, ngan libre nga edukasyon ha mga Pilipino nga natatagamtaman han presente nga henerasyon.
Gintagan-duon pa Torreros nga waray maraot ha student activism; waray maraot ha ‘pag-boses’ ngan pakigbisog ha mga katungod han mga istudyante, ngan waray gihapon maraot ha partisipar ha mga sugad nga klase hin aktibidad labi na kun an iginduduso han nasabi nga aktibidad in an katungod han kada-tagsa ngan kasaysayan han nasud.
Dugang pa hine, an nae-eksperyensyahan yana han mga Pilipino in kaparehas la gihapon han mga na-eksperyensyahan hadto han mga Pilipino, kun diin gintanggalan hin boses an mga kritiko han administrasyon ngan ka-dire paghahatag hin importansya ha sektor han edukasyon.
