TACLOBAN CITY- Nagpahayag hin pagkabaraka an mga awtoridad ha Ormoc City mahitungod nga usa-usa na nga nagkakasakit an mga evacuess tikang ha magkadirudialin nga barangay han syudad nga naguba han 6.5 magnitude nga linog ha Leyte duha na kasemana an nakakalabay.
Sumala kan City Social Welfare and Development Officer Delia D. Corbo, nga nababaraka hira ha pagkakasakit han evacuees ha magkadirudilain nga evacuation camp han syudad.
Dugang pa hini nga nagkakasakit na an mga evacuees mahitungod ha kawarayan hin malimpyo nga tubig dida han maguba han linog an water source hini.
Guinmalatumat pa ni Corbo nga kadam-an han mga nagkakasakit ha mga evacuation center in mga kanataan kalakip na an mga nag-uukot ha mga temporary tent.
Ha luyo nga waray pa naman nahipatik nga namatay ha han-ay han mga evacuees, guinduon ni Corbo nga nahahatagan naman han guinkikinahanglan nga tambal an mga nagkakasakit nga residente kun diin pira han mga ini in nag-uukoy ha sapit la mismo han Ormoc City Health Office.
