ODD NEWS- Usa nga pamilya ha India an gintotoohan nga pinakadako kun miyembro an pagbabasian hine.
An padre de pamilya han mao nga pamilya in hi Ziona Chana, aada ha 181 an ihap han miyembro han mao nga pamilya.
An asawa hine in 39 ngan mayda hiya 94 nga mga anak mayda hiya 14 ugangan ngan 33 nga apo.
Magkaurusa nga naukoy an tanan nga miyembro han pamilya ni Ziona ha lugar han Baktwang ha probinsiya han Mizoram, ngan matungod ha kadako han iya pamilya in ginkinahanglan ine niya nga igukoy ha dako nga establishemento nga mayda upat kaandana ngan 100 nga kwarto.
Importante an disiplina para ha bug-os nga pamilya labi na ha aspeto han pagpapakaon ha tanan nga miyembro hine.
An pinakalagas nga asawa ni Ziona an nangungunga ha iba pa nga mga misis hine ha pagaandam han kakaunon han bug-os nga pamilya, nga baga baga hin nagluluto para ha patron.
Ha kada pangangaon han bug-os nga pamilya ni Ziona in kaurugan nga nakakakonsumo ine hin 30 nga manok, 60 kakilo nga patatas ngan 100 kakilo hin kan-on.
Nakag asawa hin 39 kabeses hi Ziona matungod nga hiya an lider han usa nga relihiyon nga gintutugutan an mga miyembro nga lalaki nga magasawa hin damo.
Una nga nag asawa hi Ziona dida han 17 anyos pala hiya ngan kahuman hadto in sunod sunod na an iya pagpapakasal.
Bisan naman damo an asawa in dire naman nagkakasaramok an pamilya ni Ziona ngan sumala pa ha usa nga misis nga mayda respeto ha kasa usa an kada miyembro han pamilya sanglit maupay an pakikisama nira ha kada usa.
