TACLOBAN CITY – Gin-aaghat han pamunuan han PhilHealth Regional office 8 an mga estudyante ha kolehiyo nga mag paregistro na han para han ira membership.
Sumala kan Miramar Palacio, Regional Infromation Officer han PhilHealth 8, kinahanglan nga magparehistro han mga college students agud nga maka-avail an mga ine han programa ha ilarom han ira ahensya pananglitan an mga ine in ma-admit ha ospital.
Dugang pa han mao nga opisyal, nga kun an usa nga estudyante in nag-eedad 21 anyos paubos, pwede nira gamiton an PhilHealth membership han ira kag-anak kun diin kinahanglan la nga magsumiter han mga ini han mga resikitos.
Para naman han mga estudyante nga nag-eedad hin 21 anyos paigbaw, kinahanglan na han mga ine hin kalugaringon nga PhilHealth membership ha mao nga ahensya.
Samtang, para naman ha mga estudyante nga may kapas an pamilya nga makapagpagbayad hin premuim in required an mga ine nga magbayad para han ira PhilHealth account.
Sugadman, para han mga estudyante nga an pamilya in tikang ha indigent family, dire an mga ine required nga magbayad ngan kinahanglan la nga magpakita hin certificate of indigency kumo pagpamatuod nga hira in lakip ha mao nga grupo.
Mababaruan nga damo na nga mga estudyante an namag-aplay, partikular na an mga Medical schools nga una na nagkamayda hin face to face classes.
Para han mga karuyag nga magparehsitro in bumisita la ha ira opisina ngan dad-on an mga resiketos sugad han PhilHealth registration form,Birth Certificate, ngan School IDs.
