TACLOBAN CITY – Nananawagan an PhilHealth Regional Office 8 an mga health facilities ha bug-os nga Sinirangan Bisayas nga makiusa ha ira panibago nga programa nga Konsultasyong Sulit at Tama o mas kilala nga PhilHealth Konsulta nga target makaghatag hin kadagmitan nga health assistance ha mga miyembro hini.
Sumala kan Dr. Rosario Suyom, Division Chief, Health Care Delivery Management Division han PhilHealth Regional Office 8, nga panuyo han mao nga programa nga mas mapadagmit an paghatag hin assistance ha health care ha mga miyembro hini nga diri na kinahanglanon pa nga pumakadto ha mga dagko nga ospital para magpatambal, mahitungod nga an mga health facility in akos naman nga tambalon an mga gugti nga mga sakit.
Dugang pa han mao nga opisyal nga ine in magkakawsa hin decongestion ha mga dagko nga mga ospital mahitungod nga an mga pasyente in mapakadto nala ha iba pa nga mga health facilities kun diri grabe an inaabat ngan makakag pokus nala an mga ospital ha mga grabe na ngan mas nanginginahanglan hin atensyon medical.
Dugang pa ni Suyom nga an mao nga programa in preventive ngan diri hiya curable nga klase hin programa.
Ginpatapod naman han mao nga ahensya nga ira liwat ginsisigurado nga an mga health facilities nga accredited na in mamimintinar mahitungod nga mayda liwat ira inspeksyon ha mga ini.
Basar ha datos han PhilHealth dinhi ha atun dapit in mayda 48 nga mga health facilities an kaapi ha bug-os nga Sinirangan Bisayas nga kun diin, 7 dinhi an nahihimutang ha syudad han Tacloban.
