TACLOBAN CITY – Ginlalauman nga mahuhuman an phase 1 han panhingayad han Daniel Z. Romualdez Airport nga nakatalaan nga paghimuon nga internasyonal nga paluparan ha sakob hiton duha ka bulan.
An phase 1 in amo iton panukod hiton straktura sugad nala hiton mga flooring, poste para ha mga building, ngan aragian han nasabi nga airport.
Sumala kan Atty. Buenaventura “Junie” Go-Soco, Representative Private Sector EV Regional Development Council ngan Former NEDA Vlll Regional Director, nga duha na ka tuig nga nadelatar an panhingayad hine ngan dire nakakaabante ha phase 2 mahitungod hiton trabaho han kumapot nga kontraktor hine, kun diin ha nasabi nga pagkadelatar in humitaas na iton gasto hine ha P1.5B sobra tikang ha P1.2B.
Dugang pa hine, nga bisan man “very-late” ngan duro na nga nauurhi ha schedule an nasabi nga kontraktor, in na catch-up ini ha ira trabahuon agud mahuman ngan matuman an ira ginpirmahan nga kontrata, mapapadagmit mangud iton phase 2 kun mahuman na iton phase 1.
Hapagkayana, in duha na nga kontraktor iton nagbubuhat hin simultaneous o kun sagon-son nga pagtrinabahuay para ha phase 1 ngan 2 agud nga mapadagmit iton panhingayad han DZR airport.
An phase 2 naman nga kapot han iba nga kontraktor in amo iton pagtindog hiton runway, mga tulay, ngan extention ha may dagat agud mapahaluwag iton karsada.
Samtang, ginmalatumat naman ni Atty. Go-Soco, nga for bidding na an para ha Phase 3, kun diin an buhatan han Department of Public Works and Highways an nakapot, ngan nakatalaan naman nga mahuman ine nga nasabi nga international airport ha tuig 2028.
