Target han Pilipinas nga mahuman an dayalogo kasumpay ha Code of Conduct ha gin aagawan nga kadagatan yana nga tuig samtang an nasud an chair han Association of Southeast Asian Nation (ASEAN).
Ha usa nga forum ha Singapore, ginpahayag ni Department of Foreign Affairs (DFA) Secretary Theresa Lazaro nga dudugngan pa han ASEAN ngan China an working group meetings kada bulan tikang ha presente nga tulo kabulan nga intervals.
Magkakamay-ada gihapon hin kadugangan nga pagharampang ha butnga han senior officials ha ilarom han bag-o nga schedule.
Dugang pa, panuyo han pagdudumaraon nga pagharampang nga makabug-os hin usa nga code nga epektibo ngan madig-on ngan subay ha ginkasarabutan han ASEAN foreign ministers hadton tuig-2023.
Sumala kan Secretary Lazaro, nagkakamay-ada hin improvement ha pag-iistorya kasumpay ha nasabi nga code of conduct kun diin pira nga membro han ASEAN an nagsalawad han mga dokumento ngan proposals kumo giya ha masunod nga pag-iistorya han mga ine.
Pira ha mga gin aawayan nga isyu in kun legal nga mayda bisa an code ha georaphical scope nga sakop han kasabutan ngan depinisyon han mga termino sugad han “self-restraint.”
An ASEAN-China Code of Conduct ha disputed water in usa nga kasabutan nga presente gin hihisgutan agud magtudlok hin mga aludayday agud mapaubos an tensyon ngan malikayan an armado nga kasamok ha gin aagawan nga teritoryo.
