Nangaro hin sorry an Philippine drag queen nga hi Maxie Andreison kasumpay han pag-viral han video kun diin makikita hiya nga dabi ha pangastigo ha usa nga fans, tulo katuig na an nakakalabay.
”Ayoko nang maulit ‘yun. Tina-try ko namang magbago,” pahayag ni Maxie.
Ha usa nga haroas duha kaminutos nga video nga ginpaangbit niya ha social media, gin amin ni Maxie nga nagsayop hiya ha nagin pagkapot han sitwasyon ngan ginpahayag nga nagbabasol hiya ha nahitabo.
Sumala pa kan Maxie, maiha na nga nagka-istorya ngan nagkapasayluay an magkaluyo nga parte mahuman an insidente.
“Sana lang three years ago mas na-handle ko ‘yung sitwasyon nang mas matalino at mas kalmado. Hindi kasi tama talaga na manakit. Hindi siya tama kahit saang aspeto,” sumala kan Maxie.
Ha viral nga video, makikita an usa nga tawo kaupod ni Maxie nga syahan tumaplong ha usa nga indibidwal ugsa ini ginsundan ni Maxie hin panaplong ngan pagsipa.Waray naman umato an gintudlok nga fan ngay-an ni Maxie.
Samtang, utro nga nagsarang online an magkadiru-dilain nga pahayag kasumpay ha gintikangan han insidente.
Subay ha usa nga post nga ginpaangbit han pira nga netizens, nagtikang an panhitabo mahuman an performance ni Maxie ha usa nga bar, kun diin aksidente nga nabutong han usa nga hubog nga fan an wig han drag performer samtang nagpapakuha hin litrato.
Subay ha nasabi nga pahayag bumalik hi Maxie ngan an iya grupo agud komprontahon an fan. Sugadman, gin aalegar nagkamay-ada hin sayop ha pangilal-an ngan usa nga tawo nga waray sarabutan ha insidente an syahan nga nabulsan ugsa maklaruhan nga dire ini amu an iya ginpapamiling.
Dire naman ini makikita ha nagsarang nga viral video mahuman ig-cut dayun an pagkuha han viral video.
Mahuman hini, ha pag-iha in umatubang an mismo nga fan nga nakabutong ha buhok ni Maxie ngan nangaro hin despensa. An sumunod nga komprontasyon in an nakuhaan ha viral video.
Waray kahingadayi ni Maxie ha iya apology video an nagin ugat han insidente. Lugod, gin ako hini an pagbaton ha iya nagin aksyon ngan utro nga umaro hin despensa ha iya fans.
“Sana, sa susunod na live ko hindi na ako nagso-sorry. Sana last na sorry ko na ito sa inyo,” dugang pa ni Maxie ha post.
Ha presente, waray pa pahayag an kaluyo nga parte kasumpay han nagin pag-aro hin despensa ni Maxie ngan ha utro nga pag-viral han insidente.
