NATIONAL – Igin salawad han health reform advocate nga hi Dr. Tony Leachon kakulop nga adlaw, Pebrero 25, an petition for certiorari and prohibition ha Korte Suprema nga nakwestyon ha legalidad han zero subsidy o dire pag aalutaga hin subsidiya ha Philippine Health Insurance Corporation (PhilHealth) ha ilarom han 2025 national budget.
Kaupod ha mga respondent ha nasabi nga petisyon hira House Speaker Martin Romualdez, Senate President Francis “Chiz” Escudero ngan Executive Secretary Lucas Bersamin.
Ha petisyon ni Dr. Leachon, gin hangyo hine ha Korte nga mag-isyu hin temporary restrainin order o writ of preliminary injunction agud mapa-undang an pagpapatuman han 2025 General Appropriations Act (GAA) may paghisumpay ha zero subsidy para ha state insurer.
Gin hangyo gihapon ni Dr. Leachon ha Korte nga mag-isyu hin writ of mandamus agud manduhan an kaangayan nga mga ahensya han gobyerno nga dayun mag-alutaga ngan magpagawas han kinahanglan nga mga pondo para ha PhilHealth, subay ha Universal Health Care Act ngan 1987 Constitution.
Igin eksplikar ni Dr. Leachon, nga igin salawad hine an nasabi nga petisyon mahitungod ha unconstitutional o pagtalapas ha balaod an dire pag aalutaga hin subsidiya ha PhilHealth, nga syahan nga beses nahitabo ha kasaysayan han nasud kun diin dire daw gintatagan hin importansya an panlawas han mga Pilipino han Presidente han Pilipinas, magin han Senate President ngan Kamara.
