CALUBIAN, LEYTE – Waray na kinabuhi han matad-an an usa nga 23-anyos nga lalaki ha may ka-sagingan ha Brgy. Garrido, Calubian, Leyte, dida han nakalabay nga adlaw, Hunyo 29.
Ginkilala an biktima kan alyas Jericho, residente han Brgy. Patag, Calubian, Leyte.
Sumala kan Calubian Municipal Police Station Investigator, PSSgt. Enrique Obaña, waray bisan anu nga ti-agi hin samad, pinusilan, o bun-og ha lawas an biktima.
Basar han imbestigasyon, namatron an biktima kaupod an usa pa lalaki ha nasabi nga barangay, kun diin sumala han kaupod han biktima in nagtikang ine pag-ininom didto han balay nga pinamatrunan hine han banda alas-11 pala han aga dida han Hunyo 27 ngada han kakulop.
Pag-istorya pa han kaupod han biktima in waray na hira magka-bunyog pag-uli han biktima mahitungod nga hiya mismo in dida nala han karsada nahingaturog dara han duro nga kahubugan.
Tikang naman hadto nga adlaw, Hunyo 27, in waray na kakit-e an biktima ngan nakit-an nala ine dida han Hunyo 29 ha may kasagingan han nasabi nga lugar ngan harani ha state of decomposition an lawas hine.
Sumala pa kan Obaña, baga-baga hin natutuwad an kabutang han lawas han biktima mahitungod nga nakaigbaw an tiil hine ngan nakada naman ha ubos an ulo hine, sugad man ine bloated gihapon an lawas hine han marekober.
Padayon pa naman nga ginhuhulat an resulta han post mortem examination ha biktima agud mahibaruan an rason igin kamatay hine.
