TACLOBAN CITY– Waray na kinabuhi han matad-an han mga otoridad an usa nga lalaki ha Brgy.Salvacion Farm Alangalang, Leyte.
Ginkilala an biktima kan alyas “Dingding” ada ha sakto nga pangidaron ngan residente han Sitio Guintadcan of Brgy. Salvacion Farm Alangalang, Leyte.
Samtang ginkilala naman an suspek kan Jerry Pabillo, 22-anyos , waray trabaho, ngan residente han mao nga lugar.
Sumala kan Pmaj. Joshua Bien Chiquillo,Acting Chief of Police Alang-Alang Municipal Police Station, nga naka-karawat hira hin tawag nga daw mayda patay nga lawas nga nakit-an, dayon naman ine nira ginrespondihan ngan ha pag-abot nira ha lugar kun diin nakadto an patay nga lawas, in naabtan nala han mga ine nga nagkakarigo na ha iya kalugaringon nga dugo an biktima.
Subay ha gindumara nga imbestigasyon han mga otoridad, mayda binun-an ha liog an biktima, kun diin ine an gintutuohan han iya dayon nga kamatayon.
Nabaruan han mga otoridad, nga an biktima in naka-inom ngan mayda nakadebate, kahuman han mauli na ine in didto ginsundan hiya han suspek nga nakahigayon agud nga patayon an biktima.
Hapagkyana, padayon pa an gindudumara nga imbestigasyon han mga otoridad, ngan an hot pursuit operation agud nga dayon mahalpat an suspetsado han mao nga pamatay.
