TACLOBAN CITY– Waray na kinabuhi an usa nga biktima samtang ine naglulutaw-lutaw ha baybayon hiton Brgy Agpangi Naval Biliran.
Sumala kan PCpt. Edwin Simbajon, Deputy Chief of Police, Naval Municipal Police Station, pinaagi hiton concern citizen, nakit-an an patay nga lawas han biktima.
Subay ha inisyal nga imbestigasyon, nakit-an iton biktima kaupod an iya 2 nga sangkay,ngan nag-iinom-inom an mga ine ha sitio Bernardes Brgy. Antipolo Naval Biliran.
Ha kadugangan nga imbestigasyon, nabaruan nga an 3 nga magsarangkay in gin-aaligar nga nagpaprumba hiton paglangoy kun diin 2 nala an nakabalik ha pang-pang samtang an usa in gintutuohan nga nalumos.
Dugang pa ni Simbajon, ginkilala an biktima nga alyas Jun, 45-anyos, pedicab driver, residente han Sitio San Roque, Larrazabal, Naval, Biliran.
Na identipika an biktima, pinaagi hiton iya bugto, nga nagkumpirma mahuman nga mahitad-an an patay nga lawas.
