GANDARA, SAMAR – Samaran an duha nga indibidwal ngan bari naman an duha nga tiil han usa pa mahuman nga magbungguay an usa nga pampasaheros nga truck ngan delivery truck hin baboy ha Brgy. Concepcion, Gandara, Samar, kakulop nga adlaw, Mayo 6.
Gin kilala an driver han bus kan alyas Ricardo, 51 anyos an pangidaron, ngan residente han Brgy. Guindapunan, Catbalogan, City.
Samtang, an driver naman han delivery truck in ginkilala kan alyas Ryan, 38-anyos, ngan residente han Brgy. Balud, Calbayog City.
Sumala kan Gandara Municipal Police Station Chief of Police, PMaj Jonathan Camacho, tikang ha Calbayog City ngan en-route tipakadto ha Tacloban City an nasabi nga bus, samtang tikang naman ha Hinunangan, Southern Leyte tikadto ha Calbayog City an delivery truck han mahitabo an disgrasya ha kadalanan.
Subay han imbestigasyon, mayda nakaparada nga guba nga sarakyan ha linya nga gin susubay han delivery kun diin an katunga han nasabi nga guba nga sarakyan in nagawas pa ha karsada sanglit ginlikayan ine han driver han delivery truck ngan lumiko ha kaluyo nga linya, kun diin sakto gihapon nga naabot an pampasaheros nga bus, nga nagresulta han pagbungguay han mga ine.
Nag-angkon naman hin bari ha duha nga tiil hine an driver han delivery truck samtang, nag-angkon naman hin gutiay nga kasamdan ha lawas an duha pa nga sakay hine.
Gin dara naman an driver han delivery ha Samar District Hospital para han kaangayan han atensyon-medikal.
Samtang, talwas naman ngan waray naangkon nga kasamdan an driver han bus sugadman an mga pasaheros hine.
