TACLOBAN CITY – Ha kaluyo han makusog nga ekonomiya han Tacloban City ngan pagiging capital han rehiyon, pagkakamay-ada economic hub, mga malls, hotels ngan airport han syudad in waray pa ini kalugaringon nga Chamber of Commerce tikang han matindog ini kumo usa nga Highly Urbanized City, sobra napulo katuig na an nakakalabay.
An syudad hiton Tacloban in may-ada maabot 12,400 nga mga registered businesses and operators kun diin, ha kaluyo hini nga dako nga ihap in waray kalugaringon chamber of commerce an syudad.
Gin kumpara pa ni Tacloban City Mayor Alfred Romualdez an Tacloban ha Ormoc City ngan Baybay City nga aada la ha 9,000 ngan 3,000 sobra an mga registered businesses in may-ada na an mga ini kalugaringon nga chamber of commerce.
Sumala pa kan Romualdez, nakadepende pa ha Leyte Chamber of Commerce an syudad hiton Tacloban mahitungod nga ginbabalabgan han mao nga organisasyon an pag tindog hin kalugaringon nga chamber of commerce han syudad, rason han kadismaya han alkalde mahitungod nga pinaagi hini nga pan hitabo in waray sadang nga representasyon ngan boses an mga negosyante han Tacloban City ha Leyte Chamber.
Dugang pa hini, an mga negosyante nga aada nakalingkod ha pwesto hiton Leyte Chamber of Commerce in an mga nagbabalyuay la hin posisyon ngan nagreregodon.
Nagdig-on gihapon ine nga sadang la nga magkamay-ada hin kalugaringon nga chamber of commerce an syudad hiton Tacloban mahitungod nga dagko nga mga kompanya an aada ha syudad, ngan ha mga sitwasyon nga na-atubang ha kakurian iton syudad sugad hiton pag atubang yana ha isyu hiton San Juanico Bridge, in dako unta nga bulig kun may-ada boses an Tacloban City Chamber of Commerce.
Gin klaro naman hini nga waray hiya plano maging presidente o opisyal han nasabi nga chamber kun pananglitan man nga ini in matindog sugad man naglalaom ini nga maaayad ngan maaksyunan hiton Philippine Chamber of Commerce an problema nga gin kakaatubang han mga negosyante ha syudad hiton Tacloban.
Panawagan pa han alkalde, “Give Tacloban what is right”. (via Bombo Niña Magpili)
