TACLOBAN CITY – Utro nga nanawagan an grupo nga Peoplesurge ha mga taga Eastern Visayas nga magkaurusa nga magburubligay agud igsulong an katungod han mga katawhan labis na ha mga nabiktima han kalamidad ngan maipaabot an mga reklamo ha national goverment.
Una hini, in yinukot-yukot nga mga biktima han kalamidad ha Probinsya han Samar an nagdumara hin gios protesta ha atubangan han Catbalogan City Hall yana nga adlaw.
An mao nga rally nga rally in may kalabutan daw han pagbalewara ni Catbalogan Mayor Stephany Uy-Tan tikang ha diri eksakto nga paghatag hin cash assistance mahuman nga magfile an mga ini hin kaso nga graft ha Korte.
Sumala kan Jade Cinco han Peoplesurge na nag-ugat an ira reklamo mahuman nga ibanan han LGU Catbalogan hin haros katunga an dapat unta bulig pinansyal para ha mga biktima han Bagyong Ruby nga umigo dida han Disyembre 2014.
Sumala han grupo nga PeopleSurge, nga guinbalyuan han LGU Catbalogan an cash category tikang ha Totally damage hasta Partially damage nga kun imbes nga makarawat hini an 16,000 pesos in umabot na daw la ha 8,000 pesos.
Samtang, guinmalatumat naman ni Catbalogan Mayor Stephany Uy-Tan nga abre ini nga makipagdayalogo agud maklaruhan an mao nga grupo.
An guinbuhat nga rally in kadungan han guinbuhat nga International conference ha Catbalogan nga kun diin guin atenderan hin maabot ha 300 nga local ngan foreign leaders nga tikang ha magkalain-lain nga parte han Asya.
