Natuod hi Manila 3rd District Rep. Joel Chua nga dire makaka-apekto ha pag-abante han impeachment complaint kontra kan VP Sara an ginbuhat hine nga pag-anunsyo dida han nakalabay nga adlaw nga madalagan hiya ng presidenbte han Pilipinas ha masunod nga piniliay.
Sumala ha magbabalaod, trabaho nira ha hamubo nga kapulungan nga paghingadayan an reklamo kontra ha hin-o man nga impeachable official, subay ha gintalaan han Batakan Balaod.
Nag-anunsyo man o waray an anay presidente, kinahanglan daw han Kamara nga pag-debatehan ngan desisyunan an reklamo kontra ha bise-presidente, ngan an desisyon han kada magbabalaod in igsusubay la gihapon ha kabug-at han mga igpi-presenta nga ebidensya.
Dire gihapon nababaraka hi Chua ha posible nga yayaknon han kampo han bise-presidente nga pamumulitika an impeachment complaint, labi na kun maabante ha Senado, kumo impeachment court.
Sumala ha Manila representative, mayda na complaint nga naisalawad kontra ha bise-presidente dida pa han 2024 ngan 2025, kun diin dire pa hiya nag-aanunsyo han iya intensyon nga nadalagan ha pagka-presidente.
Natuman la daw nga nahuman na an 1-year-ban ngan nag-anunsyo an bise-presidente han iya plano ha tirabot nga piniliay.
Iginduon gihapon han magbabalaod nga waray na niya igkakalas an pagdedeklara ni Duterte han iya plano ha masunod nga piniliay, mahitungod nga maiha na gihapon daw ine nga ginlalauman han publiko.
