TACLOBAN CITY – Ginklaro ni Ormoc Mayor Richard Gomez nga posible nga igdeklara an siyudad han Ormoc ha ilarom han state of calamity ha luyo han na angkon hini nga danyus tikang ha pag-igo han 6.5 magnitude nga linog.
Sumala kan Mayor Richard Gomez nga tungod ha grabe nga naangkon hini nga danyus tikang ha pag igo han linog ngan tungod na gihap ha padayon nga aftershocks in posible nga igdeklara an mao nga lugar ha State of Calamity.
Ginkompirma naman hini nga basar ha Eksklusibo nga pakikipaghimangraw han Bombo Radyo Tacloban, nga nadugngan na yana an ihap han pamilya nga naapektaran tikang ha mao nga linog.
Basar ha record in maabot ha 4,700 an apektado tikang ha 12 nga barangay han siyudad han Ormoc.
Grabe naman nga naapektaran an Tongonan, Lake Danao, Milagro, Cabintan ngan Cabaon-an.
Utro naman nga ginsuspendi an klase ha mao nga lugar tungod ha utro nga gin-abat nga pagbay-og.
Nagpagawas na gihap hin Memorandum hi Kanangga, Leyte Mayor Rowena Codilla kaparte ha suspensiyon han Klase ha kananga leyte ngada buwas tungod ha padayon nga inspeksiyon ha mga skwelahan nga naapektaran han linog.
Sumala naman kan Dep ed Leyte Superintendint Ronelo Al K Firmo, nga ginsuspinde na gihap an klase ha pira nga bungto han probinsya han Leyte.
