TACLOBAN CITY– Padayon an ginhihimo nga monitoring han Office of the Civil Defense Region 8, ha bug-os nga rehiyon kasumpay hiton waray hunong nga pag-inuran dara hiton shearline.
Sumala kan Joel Erestain, Cese, Regional Director Office of Civil Defense Vlll, nga subay ha ira nagin monitoring ngan nakarawat nga mga inisyal nga report maabot ha 238 nga pamilya o 944 nga indibidwal an gin pre-imptive evacuate matungod han pag-inuran.
Samtang ada naman ha 84 nga mga lugar ha Eastern ngan Northern Samar an naka-abat hin pagbaha, pero dayon naman nga humubas an tubig-baha.
Waray naman hira nakarawat nga report kasumpay hiton pagparong han kuryente.
Samtang, nakaghipatik hira hin 2 nga missing nga parupangisda pero dayon naman an mga ine natad-an ngan talwas nga naka-uli ha ira pamilya.
Dugang pa ni Cese, waray naman magpatuman hin gale warning pero ira na gin-abisuhan hin sayo an mga sakayan pandagat nga dire na magpalawod matungod nga delikado an panahon.
Ha pagkayana, plano han ira buhatan nga pumakadto ha Southern Leyte agud nga manginano ha kabutngaan han mga apektado han Tropical Storm Basyang, ngan sugadman yana nga padayon an pag-inuran tungod hiton shearline.
Ginkakalipay naman hine, nga dire sugad kakuri abisuhan an mga taga rehiyon-8, kun gin-aabisuhan an mga ine nga mag-evacuate ha oras nga maraot iton panahon.
