TACLOBAN CITY- Duro an paningkamot han National Meat Inspection Service Regional Technical Operation Center VIII agud malikayan an pag entra han mga manok nga kontaminado hin flu virus ha Sinirangan Bisayas.
May kalabutan ini han bird flu outbreak ha probinsiya han Pampanga.
Sumala kan Dr. Maria Ancilla Zartiga, han National Meat Inspection Service Regional Technical Operation Center VIII, nga usa han mga agenda ha ira guindumara nga meeting an monitoring ha status han poultry dressing plant ha Rehiyon 8.
Dugang pa hini nga makadto an tanan nga Meat Inspectors, Meat Controlled officers ha mga dressing plants para igcheck an mga nasulod nga mga manok ha aton lugar ngan sugad man ugsa ini nga pag-ihawon.
May memo na guihapon an Bureau of Animal Industry ha ira buhatan nga diri pwede sumulod an mga manok nga tikang ha Luzon.
Samtang, nanawagan naman hi Zartiga ha publiko nga maging mabinantayon ha pagpalit hin manok sugad nala guihapon ha pagpanginano han meat inspection certificate.
