LOKAL – Igrerekomenda han Committee on Housing and Urban Development nga pasakahan hin kaso an National Housing Authority ngan sugad man an kontraktor han mga pabalay ha Hernani Eastern Samar nga kutob yana in diri la gihapon natatapos upat katuig mahuman nga maglasurbo an super typhoon Yolanda.
Manunumduman nga kakulop nga adlaw in nagdumara hin public hearing ha syudad han Tacloban an mao nga kumite agud nga mabaruan an status han pagkumpunir han mga housing units para han mga Yolanda survivors.
Sumala kan Eastern Samar Representative, Ben Evardone, myembro han Committee on Housing and Urban Development nga grabe nga anomalya ngan korapsyon an iya kinikita nga rason kon kay ano nga diri matapos tapos han NHA ngan han JC Tayag Builders an mga housing units.
Mahuman an ira ocular inspection nakita han mga Kongresista nga labot la han pagkadelatar han pagkumpunir han mga pabalay in substandard gihapon an mga ini.
Nagtutuo naman hi Congressman Vicente “Ching” Veloso nga an pagakadelatar han mao nga proyekto in sadang na nga basehan agud nga mapasakahan hin kaso nga criminal negligence an National Housing Authority ( NHA ) ngan kontraktor hini nga JC Tayag Builders.
