NATIONAL – Igin-salawad na an magkadurudilain nga kaso han National Bureau of Investigation (NBI) kontra kan anay Bamban, Tarlac Mayor Alice Guo ha Department of Justice (DOJ) kakulop, Oktubre 3.
Ine in may paghisumpay ha counter-affidavit nga igin-salawad ni Guo han panahon nga waray pa hiya ha nasud.
Sumala kan NBI Director Jaime Santiago, upat nga reklamo an ira igin-salawad kalakip na an kaso nga falsification by a notary public, perjury, obstruction of justice ngan paggamit hin peke nga dokumento kontra kanda Guo, Atty. Galicia ngan iba pa.
Basar ha nagin imbestigasyon han Task Force kan Alice Guo, nakumpirma han NBI nga peke an pirma han anay alkalde ha igin-salawad nga affidavit.
Sumala kan NBI Head Agent han fraud and financial crimes division, mahuman nira makolekta an mga sample signature specimen ni Guo, napamatud-an hine nga iba an pumirma ha counter affidavit.
Labot la hine, igin-pahayag ni Santiago nga may gin-iimbestigaran pa hira nga iba pa nga kaso nga may koneksyon ha anay alkalde ngan igpapagawas la nira ha oras nga makumpleto na iton mga ebidensya.
