TACLOBAN CITY – Gintikangan na an pagdumara han National Learning Camp ha mga iskuylahan ha Leyte Division kun diin mag-iiha ine hin tulo kasemana. Gintikangan an Enhancement Camp dida han nakalabay nga Hulyo 24 ngan maghuhuman naman dida hiton Agosto 11.
Sumala kan Karen Barril, Information Officer hiton Department of Education (DepEd) Leyte Division, mayda mga English, Science, ngan Math teachers an nagvolunteer para ha nasabi nga camp para naman ha Grade-7 ngan 8 mahitungod nga an nasabi nga grado an pukos han National Learning Camp.
Para ha English subject, ada ha 167 nga mga istudyante an naka-enroll, ha Science an 165, ngan 181 naman para ha Math, ngan mayda kabug-usan nga ihap nga 513 para ha Grade 7.
Para naman ha Grade 8, ada ha 164 an mga istudyante nga nakaenroll ha English subject, 186 ha Science, ngan 159 naman ha Math, ngan may-ada kabug-usan nga 509.
An nasabi nga mga ihap in basar pala han mga harvested data kun diin ha pagkayana in padayun pa an ginbubuhat nga pagfinalize han mga ine.
Samtang, maabot naman ha 924 an ihap han mga volunteer teachers para ha Grades 1, 2, ngan 3.
