TACLOBAN CITY – Gindudumara hiton bug-os nga nasud an National Crime Prevention Week kasumpay han pagproteher dire la han katalwasan han kumunidad kundi hasta gihapon han kada tagsa.
An nasabi nga programa in kinada-tuig nga gindudumara kada ika-syahan nga semana hiton Setyembre, pursuant to Presidential Proclamation 461 dated August 31, 1994.
Sumala kan PCapt. Hazel Vacal, Information Officer hiton Leyte Police Provincial Office, an nasabi nga programa in ginpapangunahan hiton National Police Commission (NPC) kun diin nagkakamay-ada naman ine hin magkaduru-dilain nga mga aktibidad – para han yana nga tuig, ine in gintatawag nga Pedal Para han Kamurayawan.
An nasabi nga aktibidad in usa nga bike activity nga nakatalaan naman nga pagdumaraan ha McArthur National Memorial Park ha Candahug, Palo Leyte.
Panuyo han nasabi nga aktibidad nga maipakita nga an Crime Prevention in dire la responsibilidad han mga kapulisan ngan aada ha gobyerno kundi pati gihapon han mga membro han kumunidad.
Nakatalaan nga pagbuhaton an bike activity yana nga maabot nga Setyembre 5 kun diin an ruta hine in matikang ha McArthur National Memorial Park nga magsusubay naman ha kadalanan han Palo West Bypass Road, left turn to junction Brgy. Caloogan, tikadto naman ha Guinhangdan Hill, ngan magawas naman ha may Mercado Fuel han Palo ngan magbabaybay han Palo-Tacloban Road ngan turn right ha Brgy. Guindapunan-Baras junction road ngan mabalik naman ha McArthur Park.
Libre naman daw ine nga mabubuligan hadton mga interesado bumulig, kinanglan la nga maglista an mga ine han ira ngaran.
Samtang, magkakamay-ada gihapon hin zumba activity nga pagdudumaraon kun diin libre gihapon an pagbulig hine.
