TACLOBAN CITY – Nagtikang an Muslim community ha siyudad han Tacloban han ira mga aktibidadis para ha pag-oberba han Ramadan.
Sumala kan Sultan Ismael Mesug, Vice President han Muslim Community Chamber han Tacloban, yana nga adlaw an ira pagtitikang han pag-ayuno nga mag-iiha ha sakob hiton 30 kaadlaw.
Ha mao nga mga adlaw, igindidire ha ira nga kumaon, uminom o maghimo hin bisan ano nga mga butang nga gin-aaro hiton lawas ha pag-abot han alas 4 han kaagahon tubtob alas 6 han kulop.
Obligado naman an tanan nga Muslim nga nag-eedad 9 anyos pa-igbaw an pag-aayuno o kun holy fasting labot nala ha mga mayda sakit ngan babaye nga mayda menstruation.
An holy Islamic month han Ramadan in nagtikang kakulop nga adlaw kun diin kaparte an pag-aampo, pag-aayuno, ngan paglikay ha maraot nga mga butang.
