GUIUAN, EASTERN SAMAR – Gin babaklas na han mahikit-an han mga kapulisan han Guiuan an usa nga motor nga kinawat han suspek ha Maydolong, Eastern Samar.
Ginkilala an suspek kan alyas Mayo, residente han Balangkayan, Eastern Samar.
Sumala kan Eastern Samar Police Provincial Office Information Officer, PLt. Col Alex Robin, dire la ine an gin kawat han suspek mahitungod nga nagprubar gihapon ine pagkawat hin usa nga tricycle.
Basar ha imbestigasyon, syahan nga nangawat hin motorsiklo ha Maydolong, Eastern Samar an suspek kun diin ginamit hine an kinawat nga motor para naman umiskapo tikadto ha may Guiuan mahitungod nga daw didto naukoy an ka-live-in hine.
Pag-abot naman hine ha may Guiuan in nagprubar gihapon ine pagkawat han usa nga tricycle, pero mahitungod nga waray man gasolina an tricycle in ginduso nala ine han suspek.
Kun diin, dida han ginduduso na ine niya in mayda usa nga residente nga kumilala han motor ngan nagsumat ha tag-iya han tricycle.
Pakakita han suspek nga tiarabot na an tag-iya han tricycle in dumalagan ine ngan gin bayaan nala an ginkakarawat hine nga sarakyan.
Dayun naman ine nga nag-report ha kapulisan kun diin dayun gihapon nga nag-follow up an mga ine ngan mayda naman nakag-report nga mayda daw tawo nga baga-baga hin mayda ginbabaklas nga motor sanglit gin kadto ine han kapulisan nga didto in naaktuhan an suspek nga ginbabaklas na hine an kinawat nga motor ha Maydolong, Eastern Samar.
Gin aresto naman an suspek ngan gin pasakahan hin kaso nga pagtalapas ha RA 10883 o Anti-Carnapping Act of 2015.
