TACLOBAN CITY – Usa nga insidente hin microburst o paglunod han hangin tipa-tuna nga nagreresulta hin pagbuto hin hangin ha katunaan an nahipatik ha Hilongos, Leyte dida han nakalabay nga adlaw.
Sumala kan Najib Cubio, Information Officer hiton Vice Mayors Office han Hilongos, Leyte, dire buhawi mahitungod nga waray man ine dara nga tubig an namerwisyo ha Hilongos, Leyte dida han nakalabay nga gab-i kundi an gintatawag nga microburst.
Basar han opisyal nga report han Hilongos in mayda usa nga barangay an nag-angkon hin dako nga danyos tikang ha microburst, amu an Barangay Western han nasabi nga munisipyo, usa naman daw ine nga coastal barangay tikadto ha pier hiton lugar.
Ada naman ha siyam nga kabalayan ngan tulo nga classrooms gihapon an naapektaran han nasabi nga panhitabo kun diin naukaban an mga ine hin ira atop.
Nagdumara naman na hin assessment an lokal nga pangobyernuhan han nasabi nga lugar para naman ha paghatag hin bulig han mga naapektaran.
